Un 80% dos incendios forestais que se producen en Europa teñen lugar na Península Ibérica. A metade dos que prenden en España concéntranse –contra o que a climatoloxía puidese facer prognosticar- en Galicia.
Os galegos temos fama de querer á terra coma poucos. Bautizámola, facémola nosa máis do que a fan outros pobos. E con todo, o noso monte está sometido a un perigo certo e infinitamente superior ó do seu contorno.
Como é iso? Por que? Que facemos? Lume e fume busca contar a realidade e o lado humano dos incendios forestais, desa traxedia crónica que, ano tras ano, provoca devastadores efectos medioambientais, económicos, sociais e humanos. O dos incendios forestais é un mundo de múltiples caras. No verán de 2006 imos ver algunhas delas.
